2018年7月26日星期四

三人行投資組合 (一):901泊大巴陣式絕密曝光 (07.31 前鋒騰訊持續減持中...)

2018.07.31:與球證、旁證、VR裁判兼班主商討後,繼續連日減持前鋒騰訊,增持後衞。連日減持後,騰訊已跌至組合中最二持股。跟增持中的後衞及龍門比,比重已變得越來越細。再這樣下去,似乎真的會變成風兄口中的10:0:0純後衞陣式了...

近排個個股票專家博友都鍾意以足球陣式論股票倉位。筆者又湊下熱鬧。其實一場球賽又點止得前鋒,中場,後衞,同守門員呢。。。呵呵!

前鋒:騰訊 (休克中...)
(原本有FB / GOOG / AMZN,但因國藉問題,於中美貿易戰期間被放逐出隊。結果放售後,全面爆升,屢創新高!BABA被同步大幅減持,並放到後備席。在其他科網股屢創新高的同時,騰訊不明所以在對家龍門前重傷暈倒。軍醫遠距離目測後,確認抬唔郁,決定讓佢晌場中繼續休克。) BTW, 今早FB OTC 跌左2X%,去到165邊...  人生如夢呢...  東網仲話 :

Facebook績後下瀉逾20%!騰訊恐「大難臨頭」? 

截圖SOURCE : 蘋果財經新聞


中場:全數傷出
(因中美貿易戰,一眾內銀內險內房中場球員全數重傷送院,提早放哂暑假。唯一幸存的939,斷手斷腳,自行碌返去後備席養傷。)


後衞:SG REIT / HK REIT 為主清單,主要隊員如下:
(基本上係,一群後衞泊漫無目的的哂響龍門口前遊蕩,做人肉盾牌)
  1. 領展   (Ticker : 823)
  2. Mapletree 4 (Tickers : RW0U, M44U, ME8U, N2IU)
  3. Frasers 3 (Tickers : BUOU, ND8U, J69U)
  4. Ascendas 2 (Tickers : A17U, Q1P)
  5. Ascott Residence Trust (Ticker : A68U)
  6. K2LU / BTOU / T8B / 405 / 435 / 1881 /1270 
守門員:iShares Barclays USD Asia High Yield Bond Index ETF (Ticker : O9P)
(賺息蝕價,以折箭法保護!)

後備球員:939 / 576 / BABA / DKT / SSWA
(重傷的無謂提,少到無關痛癢的也可以不提)

教練兼領隊:筆者
(毛蟹級投資者,街邊阿毛及大閘蟹的混合體)

軍醫:大灣區薄到透光的磚頭幾塊 
(幾個軍醫癡癡呆呆,坐埋一台,木木獨獨,一動不動等運到。如有球員重傷需要輸血,對不起,軍醫收到的租金仲未夠俾連自住樓在內的按揭供款,自身難保呢。球員受傷喎?自己去場邊貼塊膠布好入返場啦!)

球證、旁證、VR裁判兼班主:老婆大人 
(無上權威,證券組合一旦蝕本,有權隨時宣佈賽事中止,並解散球隊!)

球隊戰術:901泊大巴戰術...  球證未終止賽事前,一直讓球員在球場上漫步遊魂

觀眾:犬兒 
(爸爸,場波好悶呀!同我睇書書好冇?)

其他全無關係的塘邊鶴:見下圖
球員、教練、領隊、班主、球證、旁證、
VR裁判、軍醫同觀眾,全部都係你既人。你玩哂啦!(設計對白)

目前賽果 (投資收益):仲問?隊波攪成咁既樣。個領隊又懶懶閒,班球員一係就重傷休克或斷手斷腳,再唔係就在龍門前散步遊魂做人肉盾牌全隊最醒果個去左做球證。連軍醫都搵埋些唔識郁的。唔蝕都偷笑啦!

賽事匯報:會否定時報告戰況及賽果?可能、或者、唔知?如果大家有興趣知,就話筆者聽啦。但若果身兼班主的球證一旦中止賽事,並解散球隊,筆者會立即通知大家。

戰況預測:個市係咪見底?以筆者超卓的往績,一旦筆者投降離場,市況一般都會見底。但筆者仲未有耐投降喎。點解?因為班後衞似乎勁過班中前場囉!睇下"我不是醫神"會否提供個藉口俾中美坐下來再談判吧!但筆者亂估,就算中美肯傾,點都要打到八月尾九月頭啦!而筆者直覺是中美負責講數果班官員無一個想主動同對方傾,費事被當成賣國賊。所以,現階段唯有繼續大打特打,拉抬到世界大戰級別,希望逼班貿易戰苦主出來做醜人拉返雙方到談判桌。然後,中方以大局為重,勉強加碼開放埋部份醫藥市場後,中美貿易戰順便中場休息。但咁攪至少要打多一年半載啦。但就算有中場休息,過一排特帝心情唔靚,絕對會再發一次癲。真正停戰?等美帝進入衰退周期吧。咁美帝幾時進入衰退?聯儲局話左你知加息加到2020年嘛!最多咪頂到特帝連任囉。咁中國經濟幾時爆?班先知過去30年每日都同你講『就嚟爆』。你懂的!不懂就睇下筆者篇井底嘩亂噏文章啦!
重要風險提示:
請絕對不要抄筆者功課,輸死無命賠!
要抄功課,請移玉步去筆者偶像風兄個地盤。

<<>>

26 則留言:

  1. 騰訊大落後不太合理,等業績出還它一個公道

    回覆刪除
    回覆
    1. 騰訊同REIT基本上小弟係行買樓果套,買完就掩埋眼放晌度,無乜點理。
      年頭大跌市,小弟主要係清走哂中場班球員。因為無CONVICTION,HOLD唔住。騰訊同REIT反而只係減持左些少,領展仲要低位再增持。
      騰訊既然是長期持有,就由佢大落後算了... 不過今日FB,場外交易幾個鐘跌足了騰訊幾個月形成的2X%個跌浪,真係經典中的經典了...

      刪除
  2. 回覆
    1. 其實你知小弟玩股票真係好唔掂,所以點解個陣似人地買樓多過買股。但市淡果時,班後衞似乎挨得過班前場球員,至少唔會同頂位唔見三五成。
      倒後鏡睇返,其實砌這個後衞陣唔難:
      - HK只係一隻無得唔選的領展 (其他香港REIT其實無乜貨,少到不用提)。
      - SG只係選齊市價最大果堆,息率高過5%全部買哂就是了。當然當中係有膽的。我偏愛這6隻SIZE比較大息又唔錯的:RW0U, M44U, ME8U, A17U, BUOU, ND8U。其他果幾隻算係樣樣有些少咁啦。

      刪除
  3. 個個聽完個蘇都變到講波陣,正常國英效應係要推遲一陣先可以做野
    三兄你D FW平左咪可以平均成本囉,投資都係長線,阿馬信都由1000-》1700了,有時時也命也,有番正正常常一年10%都安安落落架啦

    回覆刪除
    回覆
    1. 小弟其實唔睇波,但見好多博友咁認真砌個陣出來,咪又玩下囉。
      小弟抄股真係唔多掂。性格問題。
      其實我有諗過放棄埋隻前鋒。咁直情可以唔再LOGIN入IB個ACCOUNT。咁樣成績分分鐘仲好過砌個大陣出來。哈哈!

      刪除
  4. 其實三兄都買得幾多野,咁多野邊度睇得切呢...
    btw 三兄個AT力場太強
    投資不應分國界,投放無謂的國家民族感情,理性以自己能力為先吧
    其實中國同美國上面班政治家打口水戰同貿易戰關我地春事咩~~ XD
    深呼吸退後一步再重新上路吧~~

    Btw QQ大戶呃貨同造市上落暫時中槍啫,建議你睇睇Fortnite最近既超強勁收入以中和一下香港的所謂專家們既嘈音..

    回覆刪除
    回覆
    1. 艾力兄,其實班後衞同龍門,買了就坐,無乜花時間。最麻煩係中場同前鋒,因為無乜conviction,坐唔定。所以玩到宜家,除了騰訊,基本上係長期持有的收息組合。
      投資係應該同國界分開,但有時始終較難抽離。
      謝謝有關騰訊的資訊。都係諗住同佢鬥長命,等班後衞供養佢算了。

      刪除
  5. 三人行兄的文筆好風趣👍👍 投資講求韌力及實力,今年個市係難玩咗,希望大家都可繼續持盈保泰~

    回覆刪除
    回覆
    1. 花姐,自嘲有助心理平衡。多些同你學野,才有助證券投資持盈保泰。

      刪除
  6. 買得咁散,REIT都差不多20隻,要mon住都好攰下...

    回覆刪除
    回覆
    1. R兄講得無錯,所以小弟只係買果時花時間,之後係唔理佢地的。呵呵!

      刪除
  7. 901大巴戰術 冇得輸!
    領隊兼球証...果然係權力集於一身😆

    回覆刪除
    回覆
    1. 總於有人講球證了。。。
      太太做球證係因為小弟炒股往績太差,一轉牛入熊,即刻輸走盈利的絕大部份,甚至輸突,即係一個周期白做了。所以每當利潤跌近警戒線,小弟都會問下太太係咪要清貨。上半年試了兩次,太太都話等多陣,結果都浮回水面。

      刪除
  8. 三兄係摩佬fans,以守為攻場場贏1 : 0

    回覆刪除
    回覆
    1. 本熊兄,場場贏1 : 0小弟都想。事實似乎係每個周期一轉牛入熊,即刻變回0:0同0:1居多。海嘯同大時代1.0都係咁。希望這個周期會有所不同。
      BTW, YOUTUBE又有宋鴻兵新視頻系列:潛流,值得一睇。

      刪除
    2. 多謝update, 餓左宋生節目好耐

      刪除
    3. 宋生這次又係令人腦洞大開的節目。似乎下次爆煲,又會係由衍生產品引爆了。

      刪除
    4. 宋鴻兵已說得好清楚, 唔識睇的真係要睇多幾篇 !

      刪除
    5. 上次海嘯都係衍生產品,今次如果爆,都
      十成九又係衍生產品出事啦。今時今日金融證券衡生產品的體積,比實體經濟大很多。中國經濟爆煲風險大,還是美帝玩金融槓杆爆煲風險大,根本唔駛問都知。

      刪除
  9. 最正應該係球証!

    另, 如借SGD REITS, 就唔怕蝕匯了~

    大家都持有939 同700, 一齊坐下船仔多浪漫.

    回覆刪除
    回覆
    1. 最正應該係球証!
      --> 對呀!太太做球証,這個周期如果轉牛入熊,應該至少仲有3幾萬利潤吧...哈哈!

      另, 如借SGD REITS, 就唔怕蝕匯了~
      --> 70後兄真係有水晶球,知小弟做緊乜

      大家都持有939 同700, 一齊坐下船仔多浪漫.
      --> 939同700隻艇上好多人呢!

      刪除
  10. 三兄最後嗰句,即係點人去隻賊船,輸死無命賠。三兄係901泊大巴陣式,我索性係十零零封死個龍門算數,Hea到一個點...
    但即使係咁,都不斷有人係咁嚇:債券會爆,睇你幾時死。債券會爆,睇你幾時死......

    回覆刪除
    回覆
    1. 風兄,別放在心上。華人社會崇尚股樓,對債有誤解在所難免。昔日信報曹sir都係講債券是贏粒糖輸間廠的操作。但事實買一籃子直債是否真的會輸間廠呢?水退時自然會有答案。

      刪除
  11. 好有趣的故事表達,笑中有淚圖,"清風仔"O係FB公佈業績果朝早望住FB收市後跌幅,都以為自己睇錯...

    回覆刪除
    回覆
    1. 師兄,這個周期有得笑,有得賺下,已算執到。海嘯同大時代1.0直情只有一殼眼淚。知所進退,持盈保泰,才是上策!

      刪除

悶文觀止

井底嘩 (七):零息負息無限QE就在眼前 / 我們只是代人付鈔的水魚! (筆者推介)

這篇文章旨在回應懶師姐在其主場召喚筆者,要求確認環球資產價格暴漲的原因是QE。由於這個學術問題,並非一兩句就能解答,筆者在本博另文回覆。 很多人以為 QE 是環球資產價格暴漲的根本原因。這個推演表面上是正確,因為資產價格只是貨幣現象。 貨幣濫發,必然會導致以貨幣計價 ...