2018年8月16日星期四

三人行投資組合 (二):騰訊化泥 與 閻王的溫馨提示 (2018.09.13 增持建行)

2018.09.13 UPDATE : 在軍醫全力反對下,領隊增持建行,並將之調回中場,並開始步步為營的撈底動作。軍醫話,你唔係真係信侵侵真係願意同中國重啟談判呀嘛.. 領隊話:侵侵民望下滑,為左中期選舉可以吹噓下戰果,同中國中場休息,似乎是合理之舉。況且,一條用30年時間打造,幾億人參與的供應鏈是否那麼容易被替換?中國替換美豆都無功而還啦。

2018.09.06 UPDATE : 估不到上回34X減持騰訊,到今天已是高位。似乎應驗了:昨天低位,明日高位...  班主與領隊決定要繼續減持坐晌後備席由泥變灰的騰訊,同步相應減持後衛。三人行迷你倉進入全面防守陣勢。軍醫話:老早都叫你靜靜地摺埋早D休息嫁啦... 領隊:*%^#&$@#%@!! 知你鍾意等跌市去撈底買磚了...

筆記按:本來是8月頭寫好,諗住8月尾出文,點知騰訊琴日已化作春泥了。股市既事真係一日都嫌多了。。。

上回講到,在2018.07.31三人行進行了內部會議,決定減持倉裡最大持股前鋒騰訊,增持後衞。騰訊其中一次8月頭做的減持動作是更是在近期底部34X進行,盡顯筆者低位減持的絕頂功夫。減持後,騰訊在倉內的比重已變得很細。經改動後,三人行投資組合,已變成風兄口中的10:0:0純後衞陣式了。

以下為在內部會議中的金句截錄:

軍醫團隊(由大灣區薄到透光的磚頭幾塊組成):領隊呀領隊,閻羅大王也說不要碰陽間的股票。悶悶地收下租咪好囉,玩咩股票呢。層樓磨下磨下就供滿嫁。阿囝轉眼都三歲啦。供樓三十年,轉多十次眼咪過囉。法子大師話齋:[比武,你打十次輸十次之後,你會知道自己技不如人。投資,你估十次錯十次之後,你還會以為自己英明神武,依然滔滔不絕。] 你自己知自己事,有邊次熊市,你係走得脫呢。不如,靜靜地摺埋一邊休息下。政府廣告都有話:咪倒錢落海啦...

領隊(筆者):*%/@#$%(&#$*(@W... 你估樓唔跌,已經開始調整啦。。。

wnep078p01c.jpg
電影<<與神同行2>>截圖
SOURCE : http://btt0665.pixnet.net/blog/post/117995094-%E8%88%87%E7%A5%9E%E5%90%8C%E8%A1%8C---%E7%94%9F%E6%AD%BB%E5%AF%A9%E5%88%A4

修正後的三人行投資組合
(黃色為更新部份)

前鋒:等下次牛市再招募吧!
詩云:落紅不是無情物,化作春泥更護花。
淌血中的前鋒騰訊轉眼間,已拿去後備席堆肥去...

中場:全數傷出
(因中美貿易戰,一眾內銀內險內房中場球員全數重傷送院,提早放哂暑假。唯一幸存的939,斷手斷腳,自行碌返去後備席養傷。)

後衞:由SG REIT / HK REIT等組成 ,主要隊員如下:
(基本上係,一群後衞泊漫無目的的哂響龍門口前遊蕩,做人肉盾牌。騰訊減持部位,改持另一重傷股地鐵,同其他REIT。)

領展   (Ticker : 823)  地鐵 (Ticker : 66)
Mapletree 4子 (Tickers : RW0U, M44U, ME8U, N2IU)
Frasers 3子 (Tickers : BUOU, ND8U, J69U)
Ascendas 2子 (Tickers : A17U, Q1P)
Ascott Residence Trust (Ticker : A68U)

守門員:iShares Barclays USD Asia High Yield Bond Index ETF (Ticker : O9P)
(賺息蝕價,以折箭法保護!)

後備球員:騰訊 / 建行 / BABA / DKT / SSWA
(重傷的騰訊 / 建行無謂提,少到無關痛癢的也可以不提)

教練兼領隊:筆者
(筆者升呢為"閃亮的毛蟹級投資者",成為街邊阿毛,大閘蟹與明燈的混合體)

軍醫:大灣區薄到透光的磚頭幾塊
(幾個軍醫癡癡呆呆,坐埋一台,木木獨獨,一動不動等運到。如有球員重傷需要輸血,對不起,軍醫收到的租金仲未夠俾連自住樓在內的按揭供款,自身難保呢。球員受傷喎?自己去場邊貼塊膠布好入返場啦!)

球證、旁證、VR裁判兼班主:老婆大人
(無上權威,證券組合一旦蝕本,有權隨時宣佈賽事中止,並解散球隊!)

球隊戰術:10:0:0 戰術。講完。。。

觀眾:犬兒
(爸爸,場波好悶呀!同我睇屁屁偵探好冇?)
註:本書好適合小朋友睇呢!有6歲以下的小朋友可以去買本睇下。


目前賽果 (投資收益):仲問?Give me a break!

戰況預測:個市係咪見底?筆者已成功底部減持,應該近底了。但二萬七係底,還是二萬六係底,定係都係差一個字的一萬七才是底呢?往績告訴我,筆者要投降離場,市況才會見底。但筆者仲未有耐投降喎,似乎仲未見底喎。軍醫大人已經開始鼓吹筆者,趁未輸到入肉,套定現等樓市回調再增持多一塊薄磚呢... 筆者話:等河畔跌一球先去睇都未遲啦。


重要風險提示:


請絕對不要抄筆者功課,輸死無命賠!

要抄功課,請仍舊移玉步去筆者偶像風教授個地盤。

<<完>>

42 則留言:

  1. 回覆
    1. 快兄又提小弟的傷心事。。。
      好彩成個倉只係玩票性質。
      如果重倉,真係訓唔著。

      刪除
  2. 全文重點: 你估樓唔跌,已經開始調整啦。。。

    (落後地區仍在破頂中)

    回覆刪除
    回覆
    1. R兄觀察力真強。。。
      在R兄面前講樓,小弟著實唔夠班。但R兄講到,小弟也獻下醜啦。
      雖則仍有破頂成交,小弟真係估樓市開始調整浪。傳媒已經開始借股市下跌的勢頭吹淡風了,再加埋娥六招係有些少料到的,出現微調浪,甚至跌返一兩成不出奇。

      刪除
    2. A1 就係用來畀買家鋤價用的嘛 🤭

      刪除
    3. 全兄完全洞悉市場運作。高手是也!

      刪除
    4. 三兄,我係同意你話已經開始調整啊,補充一句落後地區仍在破頂中意思係「雖然仍有破頂,但實際上樓市已經開始調整」。Sorry懶高章講到1999。

      娥六招係夾正天時地利人和來推出的,包括下半年四大睇淡因素:
      1) 下年股市見頂六個月
      2) 下半年必定加息 (金管局仲要洗橫手)
      3) 侵侵搞到局勢動盪,人心虛怯
      4) 強美元

      加上年底例淡,想唔抖下都唔得啦...
      未來一年樓市好友匿埋睇下抖音算啦。

      刪除
    5. 小弟跟R兄的意見不謀而合。似乎小弟長進了,看到R兄車尾了!哈哈!

      港人以為貿易戰好大鑊,以為中國經濟好大鑊,其實最大鑊是美國政府債。企業稅減左11%,錢從何來?一諗就知未來一兩年條路唔慌易行了。

      樓價回調一些是好事,業主無咁惡,等無樓的年青人,又有機會上到車。不過觀乎之前幾個回調浪,似乎都係樓神賣自住樓,然後有錢佬增持多幾間的局面居多。大富翁遊戲不變...

      刪除
    6. https://hk.finance.appledaily.com/finance/realtime/article/20180817/58574629

      青衣翠怡花園9座低層F室,實用面積368方呎,望青衣運動場全海景,屬屋苑優質貨,市價約600萬元,但業主急走貨,剛以569萬元賣出,呎價15,462元,低市價半成。在今次賣出單位的樓下一層G室,面積相同,上月以599萬元售出,呎價16,277元,遲買一個月已平30萬元或5%。

      刪除
    7. 既然599是頂,那569走了,也不為錯著。當然,上述假設賣家不是賣自住樓的樓神,而是有番幾件貨在手的蚊型投資者。如果小弟最細果件都去到五百尾,小弟都可能走。。。呵呵!

      刪除
    8. 600萬高牆,R兄,你懂的。。。
      小弟又夢遊,班門弄斧了。。。

      刪除
    9. 四星期後的今天,已經有大量劈價新聞浮面。

      但是大致上仍很硬,有排捱。

      刪除
    10. 回調是萬眾期待的好事!
      但第一城劈了都仲要萬八蚊呎... 似乎距離大眾,甚至投資者願望仍有距離。
      樓市回調仍需努力...

      刪除
  3. 「球證、旁證、VR裁判兼班主:老婆大人
    (無上權威,證券組合一旦蝕本,有權隨時宣佈賽事中止,並解散球隊!)」
    好現實,有無得賭究竟摩佬被抄先定三兄無得做領隊先?(笑)

    回覆刪除
    回覆
    1. 應該小弟被炒先。
      因為小弟上年開倉時承諾了太太,利潤跌到某個點要清倉,餘下的微利要買份禮物給她。跌多一周,應該接近那個點了。

      刪除
  4. "閃亮的毛蟹級投資者".....好橙裂(慘烈)

    回覆刪除
    回覆
    1. 好彩係迷仔倉,輸哂都生活如常。
      如果重倉,真係日日訓唔著了。。。

      刪除
  5. 屁屁偵探係幾好睇 😂
    另,三人行兄睇來仲有大量儲備⋯ 我指 Blog 文 😂

    回覆刪除
    回覆
    1. 阿囝前排日日追住要我地同佢講屁屁偵探。哈哈!
      全兄好細心,發現左小弟近期做左小富翁,庫存有三四篇文。。。
      下期如無突發事件,會刊出緣自風兄近排的大熱文章的創作。。。

      刪除
  6. 三兄寫文好幽默,笑死人無命賠,哈哈。
    唯一要改嘅,唔係風教授,係風教瘦,邊個傻下傻下聽呢個不知所謂、買乜輸乜嘅中風者點,邊個就輸到瘦。

    回覆刪除
    回覆
    1. 工作又咁認真,寫文又成日寫埋些悶到發慌的文章,好辛苦呢?得閒自嘲一下,等大家發現博界不只有旺市淡市都大殺三方的股神,仲有好似小弟咁既旺淡市都可以成蟹的燈神,大跌市都會笑返下無咁灰嘛。
      至於風兄的水平,有睇你博的都知係你係實力穩陣派,橫豎好多小弟咁既迷途小羔羊點都鍾意抄功課。抄你的,至少有人提大家落車。抄中財演的,上完賊車,墜崖之後都未知發生乜事。
      BTW, 你同R兄晌R兄主場果邊的對話好精彩,足見抄你功課仍然係放心之選。呵呵!

      刪除
  7. 每次股市大幅下挫, 自己組合內, 都係後買的死先...

    今次都唔例外. 坐艇都唔係第一次, 係咪不停犯錯? 過一排又最後無事...2007, 2011 如是.

    回覆刪除
    回覆
    1. 70後兄操盤能力顯然比小弟高得多。
      廣告都有話:
      買股先嚟跌市,唔通連個天都唔鍾意我。
      放心,遲早一定會變返牛市,因為「牛市在明天」呀嘛!
      其實坐艇有咩好怕呢?

      刪除
  8. 業主要交吉賣樓 (好似好趕咁).....
    雖然股市巳經下挫了不少, 可是租金也不見到回落, 又要揾樓了, 好頭痛 ...

    回覆刪除
    回覆
    1. 閣下在新加坡,也有這樣情況?不是可以申請組屋嗎?

      刪除
    2. 2000年移民星州, 近年回流香港工作, 親眼見證香港回歸前後變化之巨大, 差一點昏倒過去.... 是的, 星州人人都可以有組屋的, 確是一項德政, 人人有屋住, 社會就沒有那麼多怨氣了.

      刪除
    3. 新加坡的組屋小弟見識過,單位真的好大,附近居住環境好舒適。屋苑仲有埋大排檔。唯一不好,是比香港更熱。
      遺憾的是香港的房屋問題只會繼續惡化。在可見的將來是死局,好難拆。
      有興趣睇下小弟圖解香港房屋問題上下篇,及磚門數讀第三篇。

      刪除
    4. HaHa, 你講得好啱, 我唯一還未習慣的, 就是當地的天氣, 加上屋子大, 更加唔捨得開冷氣.... ^^
      三人兄的文章, 當然全也拜讀過, 也非常認同, 香港房屋問題是一個死局, 個人認為是因為當權者沒有一個為人民之心...住在星州太久了, 深深感受到兩地政府對其人民的分別.

      刪除
    5. 感謝支持!
      新加坡國父李生的確是很用心經營這個國家。
      香港嘛!董伯伯落得如此下場,以後還有誰敢碰樓市大山。港樓著實是歷代港人的共同悲歌...

      刪除
  9. 之前在R兄主場留了些文字,也放在這裡給他們分享一下:

    幾日前,一位好朋友發來一篇文,文中講2000科網 / 2008海嘯兩個經濟危機美股不同板塊的表現。前者公用股都要跌20隻,只有房託獨善其身,有微小升幅。後者係房託跌一半,公用股跌3成。所以除非你做短倉,否則是無處可逃,只能套現死頂到下行周期結束。所以,今天大批玩足球大陣的博友,請小心龍門後衞都可以跌到無影,化為春泥...

    回覆刪除
    回覆
    1. //今天大批玩足球大陣的博友,請小心龍門後衞都可以跌到無影,化為春泥...

      哈哈, 好些以買手機零件股打響名堂的80後開班奴,好像還未面對過退潮呢;如果熊市真的成事, 數年後這批開班高手還不知剩下幾人.

      刪除
    2. 魔兄,財演與開班者永遠不死,只要齋講齋教,唔落場就得了。不懂可以問下錯足成個浪8成時間,但奇蹟仍未輸死的沉大師。不過,唔知班80後導師們能否如大師般參透世事(或你死你事),超脫眾生,則屬未知之數。阿彌陀佛,善哉善哉。。。

      刪除
  10. “在2018.07.31「三人行」進行了內部會議“

    哈哈你們的小朋友有冇份參與?(夾埋三個人)。面對逆市,小朋友可能分分鐘有逆流見解😂

    回覆刪除
    回覆
    1. 花姐,阿囝同一般孩子一樣,最鍾意玩!在家裡走來走去無時停。有時連講故仔時間都靜不下來。股票投資這些悶蛋話題恐怕不是他那杯茶...哈哈!

      刪除
  11. 踢少場波,係場邊睇下波有時仲訓得落...

    回覆刪除
    回覆
    1. 小弟都是持同樣心態。訓得著最重要。

      刪除
  12. 屁屁偵探好睇,阿仔好鍾意,老婆一見到有新書就訂俾個仔

    回覆刪除
    回覆
    1. 犬兒很喜歡屁屁偵探,尤其喜歡找屁屁的遊戲。

      刪除

悶文觀止

井底嘩 (七):零息負息無限QE就在眼前 / 我們只是代人付鈔的水魚! (筆者推介)

這篇文章旨在回應懶師姐在其主場召喚筆者,要求確認環球資產價格暴漲的原因是QE。由於這個學術問題,並非一兩句就能解答,筆者在本博另文回覆。 很多人以為 QE 是環球資產價格暴漲的根本原因。這個推演表面上是正確,因為資產價格只是貨幣現象。 貨幣濫發,必然會導致以貨幣計價 ...