磚頭導師 (三)：磚頭道友與公屋阿婆 (上集)

老王兄借橋，三人行呈獻：

磚頭道友 與 公屋阿婆 (上集) : 磚頭道友的誕生

磚頭道友，原名”阿明”，70後土生土長港人，家中獨子，父母已退休，靠退休金生活，唯一家產就是一間買斷公屋。阿明任職港資老牌家族企業，中層職員一名，月入三萬零蚊。阿明人生格言係[止於至賤]。正所謂：生有涯，而賤無涯，阿明之賤基本上有如滔滔江水，連綿不斷。阿明雖則有俾家用，但仍屬標準啃老族，即家用俾得丁咁少，但又住又食又拎。而且，阿明貪威識食，食好用好，屬典型月光族，欠落周身咭數。阿明對自己極之豪爽，食好用好，但對身邊所有人 (包括家人)，卻均以”煎釀三寶”式處理：即係縮骨、算爆、老乜土。而且由於性格精奇，肩膀長期SHARP A，公司同事與朋友對之均避而遠之，唯有三兩個臭味相投的豬朋狗友與之有伍。

SOURCE : 電影<<門徒>>截圖

但緃使阿明姓格如此精奇，但由於把口浪過油，仍有一位青梅竹馬傻更更的女朋友”阿梅”。當然，阿梅一直都是阿明”精算搵笨”的對象。阿梅的父母為尋常中產打工仔，性格平易近人。但兩老見過阿明幾次，已經無乜好感，相處久了，更越來越討厭阿明。但兩老多番明示暗示，奈何阿梅對阿明仍舊一往情深。兩老唯有默默接受這個未來女婿。面對阿明的吊兒郎當及”煎釀三寶”，阿梅一直耐心守候阿明，等待阿明求婚，但等到”奔三"再等到"奔到三十三”都未見阿明求婚的踨影。

阿梅父母等冇可等，唯有出絕招，逼阿明同阿梅於2009年聯名買間二手兩房上車。物業當年只是200萬左右，仲有得借9成上會。即係每人夾十零萬就可以上會。有著一顆恨嫁的心，阿梅固然有儲錢習慣，也俾得出十零萬。但阿明呢？阿梅家人一直認為阿明係月光族，對他能拿出十零萬心中存疑，但阿梅拍心口話阿明係有儲錢習慣的，係好仔來的。但事實上，原本由阿明出的十數萬，其實也係阿梅掏空腰包拿出來墊支的。目的只係希望為阿明在父母心中爭取一個好印象。但阿梅絕對睇小左阿明。阿梅一直以為阿明只係月光族，但原來佢仲欠落幾十萬的咭數同私人貸款(P-LOAN)。而更令人心酸的是阿梅係晌俾完大訂，臨上會先至發現阿明惡劣的財務狀況。

本來阿梅一人都能獨力上會，但夾埋阿明居然上不了會。今次真係晴天霹靂了！結果雙方家長來了幾次圓桌會議，炒蝦拆蟹，幾近反枱。作為磨心，阿梅心力交瘁。阿明父母當然也極其無辜，雖則沒有多少積蓄，但為了阿仔，將大部份退休金奉上找數。雖則最終能完成交易，但阿梅對阿明已失去信心，本來想與阿明一同入住新單位，再儲錢結婚的念頭也隨之而打消。結果兩人改為將單位偷偷租出，以租抵供，並協議雙方一同儲錢作為結婚使費。但結果呢？雖則阿明知衰，不再使突，欠落周身咭數，但也無改月光族的習慣。亦即是只係阿梅一個自己繼續儲錢結婚。到了2011年，阿梅見阿明完全沒有長進，心如止水，決定與阿明斬纜分手，並開始將聯名單位放售。決定分手後，阿梅如釋重負，有如重獲新生。阿梅家人為慶祝阿梅與阿明分手，居然延開幾席，宴請親戚朋友！至於阿明，由於有”止於至賤”的格言護身，也與豬朋狗友大肆慶祝一下自己回復單身。

有人認為惡人自有惡人磨，但奇蹟居然發生在惡人身上。聯名單位在2011年中，居然以400萬當期高價賣出。即係那個聯名單位在2009年以海嘯後的低位200萬入貨，由於同阿梅在2011年分手的關係，同一單位居然是在2011年樓市調整期前的周期高位賣出(見下圖：中原城市領先指數 CCL)。即是這對小情侶的分手悲劇，居然造就了一個食盡了小周期的高低點的神奇成交 。也就是說：連同還給阿梅出的首期，阿明在一蚊都無出過的情況下，成功又食又拎，賺了近一百萬。連同逼埋阿爸阿媽還埋咭數，阿明由2009年的負資產幾十萬，在2011年變身為無負債的百萬富翁。當然，阿明絕對不會還返之前阿爸阿媽幫佢償還的咭數俾佢地，只係象徵式俾返幾萬阿媽開心下。明媽面上帶笑，但心中暗罵衰仔連老豆老母退休金都呃埋。

SOURCE : 中原城市領先指數 CCL

經過了這次的神奇之旅，阿明學懂了樓市低抄高賣的法門，以手上近百萬的資本，由2011年中至2016年中的幾個浪中間，專攻買賣細價住宅物業，炒來炒去，最高峰時炒出最多三間物業，資產總值幾百萬。由於阿明貪威，不停以炒樓的事跡在同事朋友間也文也武。為彰顯身份，阿明繼續大使大腳，名牌裝身，食好用好。但由於買樓收租在抵扣供樓開支，差餉稅費維修雜費後，所產生的正現金流極低。(為何買樓收租淨現金流低呢？請見前兩集：瘋狂的磚頭 (八)：磚頭撻人與佛系收租佬 及 瘋狂的磚頭 (七)：磚頭導師與夜更的士司機)

就算阿明有時借D意CUT埋唔俾家用，也不夠阿明奢華生活的開支。受限於賣家印花稅，就算肯交10%賣家印花稅，也只能每隔一年多才能出貨取回現金。而且為了保持核實收入繼續買樓，及同銀行加按時R回贈，阿明不能像以往無節制的碌爆咭消費，再分期還款。就算要借P loan，也要看準時機，不能亂來。即是說，平時阿明都是負現金流靠咭渡日，到了賣樓或加按兼R到銀行回贈時，才會突然變得有錢起來。到要再買貨，就要還返咭數同P Loan淨身先可以再入市博命。即係阿明雖則幾百萬身家，但以現金流計，過的是典型[三更窮，五更富]的人生。當然，對外阿明自稱財務自由，可以隨時退休。

為保高品質的生活，阿明最終也忍不住學人偷偷地做埋磚頭導師，向學生無風險CAP水，補助自己龐大的生活開銷。而且，為了向學生拿取最大的利益，上堂授課之餘，阿明仲提供埋度身訂製的私人財務顧問同陪睇樓服務。因為阿明所任職的公司合約訂明不能秘撈，阿明只能偷偷摸摸用工餘時間做業餘磚頭導師及顧問。由於阿明經常向學生強調每兩年轉按加按，按出樓價升值的部份及同銀行R回贈，"定期上電"後就可以大使豪花，所以被同行戲稱為” 磚頭道友”！

一代名師 磚頭道友 終於誕生了！

(本故事純屬虛構，如有雷同，實屬不幸！)

點擊前往：

磚頭導師 (一)：磚頭導師與夜更的士司機

磚頭導師 (二)：磚頭撻人與佛系收租佬
磚頭導師 (三)：磚頭道友與公屋阿婆 (上集) 
磚頭導師 (四)：磚頭道友與公屋阿婆 (下集) 

延伸閱讀：(按刊登時序排列)

叻極都係一層屯門舊樓　HIBOR急升 (作者：70後與80後 兩個小小生意人)

磚頭道友(外傳) 成人版 (作者：不敗的魔術師)