又到月尾，文章仍然沒有開始寫。唯有再一次將筆者與一眾兄弟飯局時的一些精警對話，寫一篇短文湊數。
首先，基於[錯就要認，打就要企定]的大原則，筆者就 “井底嘩 (十一)：特朗普鐵定連任 唯一懸念是他會否希望[永續]” 估計錯誤向讀者致歉。當然估錯係有代價的，筆者也為此輸左餐飯。
筆者也在此感謝”雖則都係估特朗普贏面較大，但為了應酬筆者而跟筆者對賭果位兄弟”果支靚酒。YUM YUM!
(基於各種不同原因而) 深受兩岸三地民眾支持的特朗普居然 [創業未半，而中道崩殂…]，實在是舉國同哀…
可憐為了討好主子而破天慌在選前為瘦肉精美豬開綠燈，以及以天價買下大量隨時從天空掉下來的低配備戰機的某省長… 現在拜振華上台，下錯注的某省長係咪又要再再再再次朝貢呢...
回歸正題，以下為筆者與一眾兄弟飯局/聊天時的一些精警對話：
1. 朋友A：[TRUMP TRUMP敗選代表一個時代的終結。]
朋友B：[甚麼時代的終結？]
朋友A：[真小人的年代終結，回歸偽君子當政的年代。]
朋友B：[你的比喻真係幾到位…]
2. 朋友A：[美元貶到HI HI喎。宋生 (宋鴻兵) 點睇？]
朋友B：[在美股大賺的勝利資本出海，美元環流開始了。]
朋友A：[上次經驗好似係原材料爆上喎。好似紫金、江銅、中鋁近排密密升…]
朋友C：[周期股嘛。周期股可以呆呆滯滯十年，然後一升就繼續升到爆為止。開個油價廿年CHART，自己睇啦！]
SOURCE : https://www.macrotrends.net
3. 朋友A：[經紀吹緊1000-2000幻按保放寬到七成至七成五喎。]
朋友B：[經紀發發。]
朋友A：[此話何解？]
朋友B：[政府減唔減辣都好。經紀都搵到個借口叫買家追價。叫上車客追價，梗容易過向業主鋤價啦。成交多左，經紀仲唔發發！]
4. 朋友A：[我今年推左三個朋友上車。有一個朋友更加買完一間，再買一間。]
朋友B：[做你朋友，真係有福。]
朋友A：[係你地先咁講嫁咋！其他人話我推人落火坑呀。]
朋友C：[今年上車梗係GOOD TIMING啦！印左咁多錢，最終一定響資產價格度反影出來的。現在只係經濟差同有人移民壓住樓價。]
朋友D：[咪係囉。HIBOR 從年頭超過兩厘跌到得返0.1%。如果借兩球買間細位，減一厘息已等如一年慳2皮。真係減息勁過減租…]
朋友A / B / C / D：[可惜我無頭…]
全場一片哀愁…
5. 朋友A：[間間美國大公司日日講社會責任，但資產轉哂去避稅天堂避稅，又或者透過開區域總部向州政府R補貼，大到好似AMZN咁，稅率居然可以係負數，真係離哂大譜…]
朋友B：[梗係啦。美式社會責任，得個講字。中國就真係做社會責任啦… 中國堆國企既要保就業，又要交足稅，股息仲要用來填充社保基金。沿海省份仲要省對省，市對市的支援窮省窮市，唔係齋俾錢，仲要諗埋佢果區這種緯度適合種乜野，要幫手搞埋精緻農業。你宜家去花墟同果欄，都買到好多貌似外國貨的國貨。]
朋友C：[咁我又講下中國醫療系統裡的"兩票制"。]
朋友B：[乜野係兩票制？]
朋友C：[兩票制下，政府規定醫療用品由生產商賣到醫院中間只能開最多兩張發票。國家指定分銷商，即係國藥集團之類統一招標後，生產商賣產品俾國藥。這一層次開了第一張發票。然後國藥賣俾各省各市的醫院，這裡開第二張發票。統一招標壓低左生產商價格。國家仲要規定埋指定國字輩分銷商只能膁微利。這樣醫療用品去到病人手上，就係最低價錢了。]
朋友A：[其實中央為左人民 [用得起，食得起] 真係做左好多野。可惜，無論你做左乜野好事，就算國民滿意度90%以上，在自由民主神教眼中，你都係邪惡政權…]
6. 朋友A：[近排身邊真係唔少朋友話移民…]
朋友B：[我身邊都有些賣樓籌旗移民的朋友。]
朋友C：[希望有返三、五十萬人賣樓移民啦！2016年人口普查估計有接近20萬人住劏房，再加埋近幾年年年起唔夠樓，同埋2023供應斷層，再加埋政府根本造吾到地。三、五十萬人賣樓移民騰出來的空缺，都唔頂得好耐嫁咋…]
朋友A：[香港居然攪到要等人移民來解決香港的房屋問題… ]
朋友B：[最慘家下移民好多都係唔賣樓，坐定定收租，再過去外國闖幾年，勢色唔對就隨時可以回流…]
朋友C：[港人本色，兩邊的著數都攞到盡…]
7. 朋友A：[現在，好多美國藍領袋住政府補助，同失業救濟金晌屋企做羅賓漢炒股，同睇NETFLIX等運到。其實，有冇諗過美國重啟經濟時，堆中小企大面積執哂，到時班羅賓漢想搵返野做，都未必咁易搵到工做。]
朋友B：[咁SHOPPING MALL、小商店執哂，AMZN 多左生意都會請下人的。不過，話時話，AMZN全自動化，應該請唔到幾多人喎…]
朋友A：[班人仲揹住周身咭數、學貸、車貸同按揭嫁喎。經濟一重啟，就要還錢嫁啦喎。]
朋友B：[所以美聯儲咪印錢買國債企業債垃圾債，現在乜訊號都係綠燈。大家咪炒到爆為止囉…]
8. 朋友A：[新聞話ZARA的紡織品訂單從印度撤出，去返中國喎！]
朋友B：[係呀。本來年頭有疫情，有D工人留返晌鄉下無出城搵工。做廠的朋友話咁樣一攪，今年請人仲難過上年呀。]
朋友C：[其實現在鄉村同二三線城市都有工作，都未必一定要去廣東打工。]
朋友A：[D人仲以為中國世界工廠地位不保。講足幾十年，結果中國國內市場年年增長之餘，總出口仲要係年年升。就連2019年，中美貿易戰打得最厲害果時，總出口都仲係升緊。今年應該又係再升多浸。可憐印度製造業一鋪清袋。]
朋友C：[今年，中國仲要簽埋RCEP...]
9. 朋友A：[近排又睇左D有令人腦洞大開的視頻。]
朋友B：[又係宋鴻兵？]
朋友A：[這期睇溫鐵軍。你有冇當年諗過點解可以做到家電下鄉？點解拼多多又可以做到憑農村線上消費，做到國內一線電商，甚至威脅阿里京東？]
朋友B：[願寧其詳。]
朋友A：[家電下鄉汽車下鄉，係因為當年朱鎔基在國內需求不振時，聽左林毅夫講投左巨資搞西部大開發。然後，溫家寶再響任內搞東北振興，兩任政府下來，路就鋪到農村去，所以先可以家電下鄉汽車下鄉，也造就現在極其蓬勃的物流速遞業。現在拼多多所帶動的農村線上消費，就係中國幾任政府要求電訊商不計代價將網絡鋪到農村的結果。他說很多所謂的經濟奇蹟，其實都是政府負擔大量的SUNK COST已洐生的。美國2000年的IT革命就是因為軍方投入巨資開發的技術轉為民用而出現，中國的新經濟就是因為政府投巨資搞好電訊基建。聽完溫鐵軍講中國經濟史，很多以前從無諗過的問題，就讀通了。]
朋友A：[美國一直無法用經濟手段鬥垮中國，一個很大的原因是中國是一個完整主權的國家，仲有廣大未發展的腹地。在國外需求不足時，中國可以斥巨資投資基建保持經濟運轉。所以，當年林毅夫同朱鎔基講，行中國版福斯福新政，可保二十年經濟發展。結果也就是過去廿十年關關難過關關過。而且，經過過去幾十年大量投資基建，農村消費現在也開始發力，成為經濟增長的動力之一。]
(待續… 應該冇，除非有…)
點擊前往：
舊雨新知 (三)：疫情下的兄弟幫
