中美貿易戰 (三) 美式摔角找輸家

本來本回想寫古典文學，但既然中美貿戰第一回已打完，想好的點子似乎有點格格不入。筆者唯有就來個悶蛋級別10級的比喻：美式摔角搵輸家。 台上打美式摔角，台下觀眾剝花生睇表演。台上雙方拳來腳往，仲有人疑似被打到飛起。台下觀眾直呼痛快。實質打美式摔角嘛，從來不會真打，真打多多選手都唔夠死。而且，贏左場摔角的選手自然大賺，但不要忘了輸左的那位都有出場費。如果認真要在一場似Show多過似打交的摔角賽找輸家，似乎搵來搵去，只有買飛睇賽事的觀眾。話說回頭，原來特朗普真係喜歡睇摔角。

Source: http://www.chinatimes.com/realtimenews/20150927002582-260403

回到中美貿易戰第一回合中場休息，按枱面上的協議 (見下圖)，特朗普大呼美帝大勝，實質連美媒都因協議模糊到唔知贏左乜而唔多賣帳。中方官媒力陳中方“力保原則，達至雙贏”，但睇枱面數，中國又唔多似贏左，國民也毫不賣帳，甚至話簽左南京條約。雖則結局距離國民期望 “中美大打出手，中國做下家，仍然大勝而回” 相距甚遠，但結局似乎與去年中美元首莊園會面結果沒有多大不同？去年中方已有計劃要同美帝買返些貨，都係話左以幾百億為目標，究竟同上年有何不同？因為現在白宮放風話以二千億計? 幾百億都唔慌做到，兩千億真係只有特朗普面皮厚，能臉不紅氣不喘講得出來。咁美帝除了贏左面子外，仲贏多左乜野？中國又輸多左乜野？是中國開放了金融汽車市場嗎？筆者其實仲未攪得清楚？

SOURCE : 信報 <<中美達6共識 不打貿易戰>>

邊個係大贏家就似乎仲要由時間驗證，誰人要找數就似乎好清楚了。講到這裡，一眾食花生睇摔角，唔幫拖之餘，仲睇到爽歪歪的國家，請靜下來思考找數的會否自己。因為兩個大國打交，找數的從來不會是當事國。。。

首先，美帝要求中方承諾擴大對美進口石油天然氣。選石化這一瓣，原因當然係石油一直係共和黨的基本盤。而且，買油係中國官方國企行為，可以不計成本，說到做到。美方頁岩氣企業自然開足引擎，反正貴過中東油都有人買。但中國油氣需求這塊餅就係咁大，美企仲要加大供應，中國戰略石油儲備又早已在油價低位時儲夠 60天，那找數者誰？俄羅斯既係大國，又係中方絕對盟友，唔似係輸家喎。伊朗嘛，同中俄係幾十年生死之交喎。咁找數的似乎係油組。。。可幸中國仲可以將戰略油儲由60天，再增至跟美帝睇齊的90天，有錢的話去到120天都得。咁睇嚟油組仲未駛晌中南海門口排隊叩門。但無奶油咁黑暗既。喂，係咁嫁喎，美帝從來只係反對其他國家補貼國內企業，但從來歡迎任何國家補貼美帝企業。

其次，美帝官方點名要買美帝農產品。典解? 侵霸王同共和黨個基地係農業大州嘛。由於中方買手又係國企，咁即係美帝機因改造農產品價格就算高過人，都會有人買，自然又係多多有得種。中國係社會主義國家，又不能不照顧廣大農民。咁又係供應增加，需求不變。咁找數係邊個呢? 請自行查下邊個國家恰巧出口產品與美帝最強的農產品高度重覆的，就係疑似輸家。中美貿易戰期間最受惠的巴西係乎中箭比率係100%。其他嘛，請各位師兄師姐指點一下。

再者，要維護枱面上現任美帝侵霸王對中國貿易戰的勝果，要削多些赤嘛？賣飛機果間波音肯定贏到開巷，咁邊個輸？段估唔係中國國產C919商飛掛，因為C919又係細機，又好似得個殼係中國自制喎，裡面堆零件都係入口的。好似下周默克爾訪華喎？傾乜唔駛問我掛？不用默克爾訪華，法國已經出聲。(見下Link)

憂成美中貿易協議犧牲品 法國籲歐洲硬起來

http://hk.on.cc/int/bkn/cnt/news/20180520/mobile/bknint-20180520204533723-0520_17011_001.html

上面係枱面上美帝疑似已贏走的籌碼 (其實上年中美首腦莊圍會議，中方已經話可以給。) 咁仲有邊殊可以搵夠條千億大數等特朗普威威呢? 即係仲有那些範疇會出現隱性輸家呢？咁就要睇下美方仲有乜野工業仲留晌美國未出走了？高科技同醫藥？又係中方弱項，點都要進口，咁同邊個買無乜分別，輸家都唔似係中國？咁邊個輸？歐盟似乎唔多願找數，那似乎這已預視中國交了捧給歐盟，下一場大戰會係歐盟對美帝。

筆者仲有個陰謀論？聽聞有幾百億美國芯片係供俾不同的第三國做加工之後，再轉給中國製成電子產品出口全球市場。咁大條數，都唔算成美帝對華出口，唔止中國唔Like，侵侵要做盤靚數呃選民，都肯定唔Like啦。咁要用到這條數去加大美國對中國出口額，一定要諗下縮數，將這部份變成美國對華直接出口。有兩條路可走？一係加工果part轉返去美國？一係美芯直接出口俾中國自行加工，唔經第三國？筆者唔熟半導體，但聽聞台積電已經晌中國起緊大型晶圓代加工廠。仲有第三條路係搶人地的晶片去美帝屋企生產。東芝晶片部又咁啱賣左俾美資基金，中國本來唔批，但家下又似乎會批左喎，會否轉返幾間廠去美帝大本營生產呢? 仲有邊條數可以諗，又要請師兄師姐話我知了？

結論似乎係：大國打交，細國找數？應該係？除非唔係？但歐盟一來係大國，又唔似牌面最弱果家喎？咁歐盟找左中美條數，咁歐盟條數邊個找呢？中國話：“交又唔見你同美帝打。同你單哂眼我缺芯，等極你都唔幫拖。現在咪開放左汽車市場俾你囉？唔夠數？搵下家啦。。。” 又要麻煩聰明的師兄師姐諗下仲有邊位下家將會慘成終極苦主了。俾筆者估，日本似乎係頂頭大熱。典解? 侵霸王話佢重視個人關係，同習大大係好朋友，所以俾面佢嘛。咁你安倍大帝晌美國總統大選果時企埋希拉里果邊，唔打你打邊個呀? 你唔係以為侵霸王真係好鍾意同你打高爾夫嘛，佢好似最鍾意係睇電視同上Twitter打卡喎，唔通你去白宮陪佢睇電視同打咭咩。。。

筆者必須說明，到現在仍看不懂打了兩年，每場都動刀動槍，槍林彈雨的中美貿易戰，結局居然可以是如此草率，連一個雙方能同意的聲明也沒有。筆者認為雙方打了一圈，發現打不下去，反而回歸了去年中美莊園會面的結局，即係中國承諾搵下方法減貿赤(連金額都寫唔出)，美方面子贏了，只是輸家由中國轉移到美帝大小盟友歐盟，日本及油組。(所以話美帝盟友通常負責孭鑊，做中國下家，就點都會照住下) 當然輸家仲有個為主子孭鑊， 分分鐘被人鬧為漢奸的鶴叔。筆者隱隱認為這個結局與歐盟不願在貿易戰中選站邊有關，事實上，這場貿戰，兩韓，甚至英國都有在中興事件後，出手為中國助拳，獨不見歐盟做了甚麼。如果歐盟願意企埋中國果邊與美帝開拖，而不是希望美國幫自己打開中國貿易壁壘，結局可能並非如此。

但若果有人期望透過貿易戰可以真的減到貿赤，筆者則認為完全不可能。就算未來幾年，中美貿赤能減少幾百億，都只係從其他國的貿易中抽出來給美帝，長遠中美貿赤仍會然會創新高。就如同當年，中國透過一帶一路送走大量中低端工業一樣，美國對中國貿易赤字仍然屢創新高一樣。因為生產這種苦差，美國人根本不願做。美帝最愛嘛，消費買買買，炒炒賣賣，寫下軟件做下Show 。這點美帝明白，跨國企業更明白。只是這一次中美收兵，似乎中方得罪了歐盟，要如何修補，似乎比是否會打中美貿易戰2.0來得更急切。

有關貿戰戰果的報告，筆者選了兩則給各位參考，有中有英，請自行選擇：

http://www1.hkej.com/dailynews/headline/article/1847554/%E4%B8%AD%E7%BE%8E%E9%81%946%E5%85%B1%E8%AD%98+%E4%B8%8D%E6%89%93%E8%B2%BF%E6%98%93%E6%88%B0

https://www.reuters.com/article/us-usa-trade-china/china-agrees-to-import-more-from-u-s-no-sign-of-200-billion-figure-idUSKCN1IK0PM

點擊前往：

中美貿易戰 (一) 假如中美貿易戰只是煙幕

中美貿易戰 (二) 大太監小綠子  (*筆者推介文章)

中美貿易戰 (三) 美式摔角找輸家

中美貿易戰 (四)：尿布變呂布 神功蓋世萬人敵
中美貿易戰 (五) 數量型單刀橫傳 與 質量型底線傳底 (世界盃特別版)
中美貿易戰 (六)：美歐自由貿易達成共識，中國陷孤軍作戰，仲唔死梗？   (*筆者推介文章)