2018年6月15日星期五

鑽牛角 (一):主流傳媒、主流思想、主流方向

這個新系列 <<鑽牛角>>屬於筆者想寫好耐,好想刊出,但又覺得文章的小眾內容極其趕客,所以一直放在倉底...  各方好友,如果又不幸睇左,請當時運高無睇過...

在開BLOG前,筆者有很長一段時間沒有寫一些有意義的文字,除了因為太忙,更重要的原因是我的思維從來不屬主流,若果在其他平台討論,寫出來很容易被圍剿。在主流當道的世局,可能做個沉黙的小眾來的更輕鬆。然後,我越來越發現,流於偏鋒是一種幸運,因為當你習慣思想偏鋒,會有意想不到的發現。如果你也喜歡這類不屬主流的意見,不妨留言,切磋一下。

SOURCE : http://www.thegatewaypundit.com/2017/12/trump-delivers-lumps-coal-naughty-fakenews-media-christmas-eve-insider-polls-strong/

主流傳媒最經典的錯誤是在2016年尾美國總統大選,相信大家記憶猶新。當時,主流傳媒告訴我們:民調顯示希拉里九成贏出美國總統大選 (見上圖)。偏鋒告訴我,民調只顯示支持度,選舉勝負是基於支持度X支持者的投票率的總和。特朗普的支持者的投票率比希的支持者高,所以在支持度差距不遠下,特朗普有勝選機會。當年筆者在朋友間打賭中,的確是貼中了特朗普當選,仲贏左餐飯。點解咁叻豬?筆者有睇"57金錢豹"嘛。一笑!

其實,這類的例子多不勝數,以下筆者列出幾個給大家看看 (當中有些概念不是沿自於筆者,是從其他高人的言論中吸收過來的養份)

從本人懂事至今,甚至2008年金融海嘯期間,主流傳媒均告訴我們:香港寸金尺土,樓價好貴,是癲價,是天價,存在極大泡沫。偏鋒告訴我,貨幣才是世上最大的泡沫,拿住現金,比拿住任何能產生固定現金流的投資物 (包括磚頭) 更危險。過去100年,美元購買力下跌了96%,而且購買力將隨著全球主要央行繼續不停印銀紙而繼續下跌。如果有日雲吞麪100蚊碗,上車單位1000萬起跳,代表我們富貴了嗎?還是貨幣陰司紙化? (有興趣者可參考:70後兄最近一篇鴻文<<收租三十年 唔上唔落的收租仔>>,也是在講貨物通脹及資產通脹。)


Source : https://fred.stlouisfed.org/series/CUUR0000SA0R

2009年至今,主流傳媒告訴我們:美聯儲區局會大幅加息2-3厘。偏鋒告訴我,債仔主動大幅加息俾債主是不合邏輯,美國政府的財政情況長遠來說過不了金管局的3厘壓力測試。(20兆美元國債規模 X 3厘額外利息 = 6000億,等同美國政府2015年全年財赤) 所以,問題並不是美聯儲能否加足3厘息,而是美國能在較高息的階段堅持多久。下圖是美國10年期國債孳息率 與 國債佔GDP比率。幾十年數據話你知兩者係反向關係,即係國債佔GDP比率持續走高,息率就持續走低。年輕人有年輕人的體質,老年人有老年人的體質。美國已是成熟(老年)經濟體的體質,期望美國息率長期處於高位,與等如期望長人家能長期頂住每分鐘>100下的心跳一樣無稽。(見:貨幣洪流 (二):加息‧神‧話 (寫於2017.03.08))

Source : https://www.pragcap.com/lets-talk-about-the-us-governments-interest-burden/

2012年梁特上台,主流傳媒告訴我們:香港樓市未來數年有大量私樓潛在供應,平均每年有多於2萬伙。偏鋒告訴我,供應不是以伙數來量度,是以供應能承載的人口來計,即是伙數X每伙可以住的人數的總和。當市場不停製造出只能住1-2人的納米單位,近年的1.8萬伙私樓供應量,與過往以兩三房為主力供應的年代比較,以承載人口作對比,眼下的供應可能要只及得上以往的六七成。結果,只是面數見得下人,但實質2010-2019E 這十年無論新增私樓單位數目與每個單位能入住的人數,恐怕都是歷史雙低組合。仲低過60年代呀... 玩咩!而且一年萬多兩萬伙的私樓新供應可能連一年的正常新增私樓需求也不足以應付,更遑論彌補多年來造成的供應缺口。(詳磚門數讀 (一):圖解香港房屋問題 (上)  圖解香港房屋問題 ())

 資料來源:差餉物業估價署 香港物業報告2017 香港物業報告2018初步統計數字



201X年起,主流傳媒告訴我們:供款佔入息比率極高,2018年條數已達68%,樓市出現借貸泡沫。偏鋒告訴我,供款佔入息比率達68%根本過不了金管局的壓力測試。實際供樓人士目前平均供款佔入息比率僅為三成多,而且還有64%以上自置物業的業主已供滿樓,拿著現金契(見下表)。如果用按揭與單位市值比,借貸比率將會更加更加低。樓市有借貸泡沫?唔... 唔似講緊香港囉。若果看倌有時間的,請搵下美帝的果邊條數。如果香港咁健康都叫借貸泡沫,咁美帝果邊的樓按、咭數、車貸、學生貸款一大堆債務疊加,再加家庭無乜儲蓄手停口停,小弟真心唔知應點稱呼這種借貸狀況,但相信美帝評級機構應該會評為十分健康。

BTW:有個極有趣的現象,20-24歲的戶主群中沒有按揭在身的居然有>70%。無他,"英雄出少年"?唔恨得咁多嫁啦!最少供滿樓既年齡群係乜水?你估到啦!仲問...  咪我地這些30-45歲的廢中囉!

SOURCE: https://www.bycensus2016.gov.hk/tc/Snapshot-05.html

201X年起,主流傳媒均告訴我們:以家庭全年入息中位計算,買港樓要不吃不喝1X(最近一期,說是19)。當然,筆者絕對承認港樓係好貴,貴到好離譜,亦無意將樓價合理化。但偏鋒告訴我,香港一半人住公營房屋。如果以家庭全年入息中位計算,即係但凡是不住公營房屋的,都應該有能力買私樓?根據2016年中期人口普查,以全港250萬個家庭計,全港月入10萬元以上的家庭有16萬戶,月入6萬元以上的超過41萬戶。在每年二手成交量只有大約4萬宗的今天,成交價究竟是依隨全年入息中位數的家庭去決定,還是購買力最頂尖的那部份人群去決定呢?如果是後者,這個"買港樓要不吃不喝19年"的指標對香港而言,究竟有多大的參考價值?而且,邊個話買樓一定要用工資呢?不能用現有資產買嗎?新盤市場的新聞已話你知,大把人買樓係唔駛上會的,係一筆過用現金找數的。一筆過買樓的,唔一定係國內同胞同新移民,大把港人儲蓄戶口都有10球8球港紙啦。筆者絕對不敢睇低香港的隱形富豪,搵有錢人唔駛去中環金鐘,舊區街市檔主、做食肆果班前輩,仲有大班廠佬同(前廠佬),大把人疊水到嚇死人。
再利申同舌伸:筆者係有幾塊薄磚,但係絕對認同家下港樓樓價係好貴,貴到好離譜的!但正因為貴到離譜,我們更要去理解港樓中了甚麼劇毒,而貴到堅離地。筆者認為影響資產價格最大的是貨幣,與該資產的供需。本文的磚門解讀系列是有關港樓的基本面分析。貨幣洪流系列則是講貨幣面的問題。
Source : 香港01 : 【人口統計】全港1成家庭年收入過百萬 你的人工全港排第幾?

壓軸的來了...

2017年尾,主流傳媒告訴我們:美聯儲局在縮表收水,會出現流動性危機 (見下面第一張圖)。威水囉!縮左成千幾億美元。咁咪世界末日囉!咪住,睇埋下面先啦。


Source : https://www.federalreserve.gov/monetarypolicy/bst_recenttrends.htm

偏鋒告訴我,自2008年金融海嘯打開了量化寬鬆的潘朶拉盒子後,全球主要央行紛紛仿傚。現時全球流動性的提供者已不只美國一家,而是有中歐美日四大陣營。現在,自美聯儲局開始縮表收水後,中歐日央行放出的流動性,其實仲高過於美聯收水的規模。見下面兩張圖係歐盟M3、同中國M2。傳媒經常有意無意誤導讀者,令人以為停止量寬等同市場上的錢會越來越少。但實質停止量寬只是央行由極度瘋狂變態無恥式的印錢速度,回復到往常非常瘋狂變態無恥式印錢的狀態。打個比喻,有個十級變態佬,連常人諗唔出的變態野(量寬)都做勻哂,有日同你講,佢暫時唔做住最變態果樣野,你會唔會當佢正常人看待先?所以,筆者絕對唔明點解脫去量寬外衣後,傳媒要當央行真心想唔再印銀紙囉。大家唔係真係以為四大央行日後唔會再徵我地鑄幣稅呀嘛?






睇數據,查實就算美帝縮表,美國M3都仲升緊 (見下圖)。即是美聯儲局開始縮表收水後,我們仍舊水浸眼眉,甚至洪水越湧越多。而且,過去十年,全球四大央行放了一個大平洋都裝不下的水,現在美聯儲局縮表收水,猶如想用BB匙羹舀走源源不絕,從四方八面湧來的滔滔江水,實際效果恐怕是聊勝於無。要收水見返些少成效,恐怕要等歐央行年底真的停止量寬才真正見真章。(<<量化寬鬆、美債危機與全球流動性>>)


Source : https://fred.stlouisfed.org/series/MABMM301USM189S

上述只係小弟暫時諗到的。諗到再添食下一集... 應該有,除非冇。

最後,筆者曾聽過一位高人說 “傳媒只報道佢想你知的事,而不是你應該知的事”。筆者在此金句後加上兩句變成:” 傳媒只報道佢想你知的事,而不是你應該知的事。傳媒甚至會誤導你,令你離真相越來越遠”。信傳媒一成,應該不只雙目失明。筆者再次以宋鴻兵先生一句影響筆者最深的語句作結:(以下非原句,僅為大意)  ”眼見耳聽都不為實,真相只在邏輯推敲後呈現。睇方向報、生果報、施恩恩等美帝FAKE NEWS,不如閤埋眼,訓多覺好了......

53 則留言:

  1. 三人行兄,你講哂D秘密出來......不過要明的就明,唔明的始終唔明

    回覆刪除
    回覆
    1. 謝謝師兄留言。

      師兄似乎好抵得悶,仲知道本博的重大秘密:小弟又夢遊亂噏了。夢囈嘛,當然係明就明,唔明就唔明啦...明就買返些少有穩定正現金流的資產傍身啦。四大央行絕對係乜都做得出的十級變態佬...

      其實,上篇好地地有些少娛樂性,即刻出篇水蛇春悶到暈的文,好在仲有些唔怕悶師兄。下篇會係磚頭道友與公屋阿婆,寫緊。

      再次感謝咁悶都睇哂全文!

      刪除
  2. 沙發!
    三人行兄真係好有心機寫, 值得一讚!

    1. 美國加息, 亦有好多人話佢個張係無限的黑卡,利息? 照印可也
    但97年的債務上限同08年後QE的債務上限不能同日而語. 最緊要係08後中日歐央行都共同祭出QE呢個咁無恥的武器, 其原因, 唔係為左買債埋單, 係埋小市民單!用印銀紙機去印走錢的"內含值/購買力". 君不見人工唔加而物價狂升, 做就REAL PURCHASING POWER/MONTH 大倒退....即為搶奪市民辛勞成果
    仲有咩搶劫比搶劫成個國家的市民更著數?

    2. 私樓供應方面, 地係有, 但係要認清一個事實, 香港係靠賣地開飯的!等同一個執紙皮/賣血的人, 紙皮價格/血價跌, 但係仲有全家等緊你開飯, 你會唔會賤賣? DSD 15 同埋3辣招正正係加左一種稅基, 而又唔需要賣地, 中國係叫"流轉稅", business tax, 只靠"轉"就OK, 如此咁爽皮而又仇富的稅制會否取消? 在情, 在數理, 在法, 也不會; 而地價亦唔會平, 因為要頂住個地價/樓價, 個"流轉稅"先可以收得更多; 或者偏鋒一點講, 係谷高個價, 先可以收多D稅, 呢件政策出發點唔係幫助想買樓的市民, 請務必認清事實!

    3. 按揭壓測唔駛講了,保護銀行德政, 你市民借唔到錢, 咪大陸人買, FP無問題, 68% 計埋CREDIT CARD的負擔比率根本係誤導

    4. 樓價的定價係由"能買得起的參與者"去定, 公屋住戶/居屋住戶必定要EXCLUDE, 此乃COMMON SENSE, 偏偏政府官員唔會話你知 (張司長9間, 係小市民想聽自己想聽的RATIO, 那政府只好成人之美)

    5. M3收水....如果你有一日見到美國有財政盈餘你先好諗下會唔會有錢還債而可以調升利息吧. 日日都係印錢派俾佢地D福利主義受益者/政府工人士

    回覆刪除
    回覆
    1. 沙發!沙發! :P
      其實歷史不斷重複,中國歷代都一樣,最後都係印銀紙搶奪市民!

      刪除
    2. 快兄,沙地其實好好坐。我晌魔兄果邊連續坐了三次。
      小弟等緊綠洲茶客。通常沙地有人坐,綠洲茶客就會出現了!

      刪除
    3. 快兄寫幾分鐘仲精彩過小弟寫幾粒鐘... 叫小弟情何以堪呢...

      你果5點,小弟全部搭唔到嘴,決定唔搭。

      但為了攞返個尾彩。諗左幾粒鐘,整返個靚比喻比師兄。

      波叔退返3皮薪俸稅,有冇人覺得爽?梗無啦。明明收左我10皮,退返3皮,咪仲要俾7皮,爽乜X。
      咁又有冇人覺得下年波叔會完全唔駛你交稅呢?你SHORT嫁,波叔又會咁好死啦?

      套返美帝同四大央行徵我們鑄幣稅。
      美帝縮表退左D購買力俾我地喎,有冇人覺得爽?梗無啦。明明銀紙俾佢偷薄左96%,退返0.00001%俾我,爽乜X。
      咁又有冇人覺得縮完表後,下期美帝同四大央行會唔再徵我們鑄幣稅?你SHORT嫁,央行班死變態佬又會咁好死啦?

      故事完…. 請鼓掌…

      刪除
    4. 2012年時的舊文,現在也一樣合用:

      http://magician__yang.mysinablog.com/index.php?op=ViewArticle&articleId=3554269

      根據以上「報導」,香港家庭每年收入中位數為24.9萬元,即係話有一半的家庭一年係搵得多過24.9萬,亦有一半的家庭一年係搵得少過24.9萬;同理本港住宅樓價中位數315萬元就係話有一半住宅單位(包括二手居屋、夾屋、租置等?)係貴過315萬,亦有一半係平過315萬。

      之但係,睇樓價中位數有意義嗎?

      做一個極端一點的假設,倘若沙士重臨,經濟崩圍,樓價大跌,樓價中位數為100萬,所有小業主唔係負資產就係惜售(怕失業搵唔返份工去供新樓),市場上就只剩下針對受影響較少的富豪級人士的沽盤,故此中位數低唔代表一般人可以買到樓。由此可見,一個涵蓋所有住宅單位的樓價中位數並唔代表市場的可買賣的盤源

      刪除
    5. 魔兄,本文重點其實就是講很多主流媒體的所謂報導或研調,其實都是誤導,或以偏概全。本文其實並非在講投資,只是恰恰能明顯以數據或邏輯去論證傳媒誤導,又在小弟涉獵範圍的就是這幾個點。
      魔兄的舊文相當精彩,恰恰這些需要咀嚼,思考,甚至反覆論證的文字,在現今講求即食的世代沒有多大市場。有些文字寫下來,沒多少人看,看了也可能不肯咀嚼,也不明。有時心思用了,但求用文字釐清了自己概念就好。有一兩位知音,已算十分幸運。

      刪除
    6. 去返魔兄篇文,魔兄講出住宅價格中位數與家庭收入中位數比,應用於衡量樓市是毫無意義。小弟想起法兄大師一個十分好的比喻:”十個富豪搭地鐵,但地鐵得六個位,爭輸果個要行路。咁地鐵票價會係幾多錢?”這個比喻似乎比那個比率有意義得多。
      本來中位數與中位數比已是無乜意義,再加上香港隻有形之手,在供需兩端都極多不同類型的干預。這個比率除了俾大家鬧下政府無能外,真不知用來做乜。

      刪除
    7. 快兄言簡意賅,我仲懶,五字以蔽之。

      「張司長九間」,完!

      刪除
    8. 真係身體最誠實,好多政府高官都揸住大把物業。與其聽佢講甚麼,不如睇佢做甚麼好過。。。

      刪除
  3. 我信風水大師說, 2018年-2019年因為土多, 所以會是買樓的好時機, 所以會等樓價跌買多間自住 :)

    回覆刪除
    回覆
    1. 通脹要來, 買金買銀買磚頭 !

      刪除
    2. 前輩口袋好深。
      正所謂"本多終勝",如果下年再來一次樓市HALLOWEEN,睇怕小弟都係唔夠前輩搶嫁啦...

      刪除
    3. 後生仔要慢慢來, 唔好似阿邊個一定要人在年輕時就要退休 !
      Do the right thing at the right time !
      Buy the right thing at the right time !

      刪除
    4. 呵呵!小弟實有排都退不了休。

      刪除
  4. 我也不去估頂,泡沫可以超乎想像,隔岸觀火

    回覆刪除
    回覆
    1. 四大變態佬印銀紙,根本無底線可言。所以估頂嘛,留俾財演好了...

      刪除
  5. //如果有日雲吞麪100蚊碗,上車單位1000萬起跳,代表我們富貴了嗎?還是貨幣陰司紙化?

    小時候常想我地係咁燒銀紙落下面,下面的人要用一疊疊冥通去買廁紙,不如直接用冥通解決會唔會更方便快捷?

    回覆刪除
    回覆
    1. 快買多幾包廁紙儲起來 :)

      刪除
    2. 全兄講開陰司紙,石SIR有篇文講"元寶、陰司紙和溪錢"的比喻,十分有趣。貼晌下面俾大家笑下:
      "筆者謂世界貨幣因為各國狂印銀紙,最終會留低3隻︰元寶、陰司紙和溪錢。這3隻畀「鬼」使的貨幣也是有分別的。元寶有塊所謂金箔,會貴啲;陰司紙有些油墨,價中間;溪錢是草紙打3個窿,最平。你去紙紮舖買這3樣就知。美元、歐元、人民幣,哪隻是元寶,哪隻是陰司紙,哪隻是溪錢,不是1、2年可見,而是要20、30、50年才可見。"
      SOURCE : 貿戰?No,匯戰 2018-04-23

      刪除
    3. Martin Amstrong 說2032年中國會領導世界, 美元沒落, 而歐盟好快會解體 !

      刪除
    4. 預言嘛,同傳媒新聞一樣,當睇故仔好了。
      無哂世界頭兩大經濟體:歐盟同美帝,世界會變成點,木宰羊。

      刪除
    5. 唔好睇小自己國家 !
      所以我預仔女同孫都會回流 !

      刪除
    6. 小弟無睇小自己國家,只係唔敢睇低美帝同歐盟啫。爛船都有三斤釘嘛。

      刪除
    7. 美帝有粒reset制
      地位只會式微,買路錢還是要俾的
      何況中國科技還遠未能自主
      靠抄考不能成大器
      給鬼頭還應該要欺負多30年

      刪除
    8. 先睇實2032年 :)
      到時手上一定要持有實物多過網上野, 因為可以來個大震盪 !

      刪除
    9. 做霸主應該不能只有錢吧。有些學習過程應該不能避免。觀乎英國從霸主位退位左幾十年,仲也文也武。相信美帝真退位,都仲有排呼風喚雨。當然,主觀願望是前輩預言成真吧!

      刪除
  6. 三哥,好文章,期待下集.

    回覆刪除
    回覆
    1. 歡迎光臨。謝謝欣賞敝文。請繼續留言指教!

      刪除
  7. 1. 「所以,問題並不是美聯儲能否加足3厘息,而是美國能在較高息的階段堅持多久。」正是美帝招七傷拳,所以加息升匯收水一齊做,佢認為其他人一定會早過自己倒下,好讓佢剪羊毛。
    但看美孳債曲線已去到十幾年低位,今次勝負未可知呢。

    2. 一缐城市高樓價係大勢所趨,於港而言多左個「洗牌」因素,也是歷史進程之一。

    3. 可以說香港銀行體系越來越不是為港人服務,而是為人民幣服務。

    4. 只要政治正確

    5. 美帝一日有財赤貿赤,一日都唔會「真.收水」佢只想挾人地幫佢找數。方法便是貿易制裁、金融制裁;找代理人出手(沙特、以色列)遲早佢自己都會落場。

    (三人行兄啲topics 好有趣呀)

    回覆刪除
    回覆
    1. 本熊兄的留言同快兄一樣精彩。小弟沒有多大補充。
      只係第一點,小弟係有點擔心。因為小弟絕不認為侵侵大帝比奧馬大帝高班出多少倍,侵侵現時出的法寶,奧馬無理由唔知。但侵侵現在是所有家當法寶都拿出來賭這一場剪羊毛大局,這場大賭局2020前一定會決出高下,並且有相當數量的國家倒下,否則美帝再下一個浪恐怕已不再有當下的勢頭,領導世界。
      小弟又夢遊亂噏了。。。

      刪除
    2. 對上一次美帝短息減至零是 30 年代美國經濟大蕭條,利率回歸正常有賴的是二次大戰。希望我的夢境比三人行兄的更遠⋯

      刪除
    3. 全兄,其實侵帝走緊鋼線,係咪用貿戰去令利率回歸正常化就唔多知。但貿戰走落去條路徑就好易估。有人話當中美互曬各1500億美元關稅後,美帝再出加碼,中國就無計可施。實則單計互曬1500億,美帝賣的啖啖肉,中國賺血汗錢,以附加值計,美帝蝕到暈。如果再曬落去,中國唯有用民族主義打在華美帝品牌。再曬落去美帝唔通全面禁賣芯片俾中國,再諗仲唔係全面大戰。屆時就真係好似全兄的預言咁大檸樂了。

      刪除
  8. 三人行兄, 初到貴境。
    見到你篇文, 睇完後心裡一沉, sad but true。
    要慢慢追番你之前D文章細讀。

    回覆刪除
    回覆
    1. 歡迎光臨,有失遠迎。
      二當家因何事心裡一沉呢?
      小弟夢遊亂噏之話,著實毋須太認真呢!

      刪除
  9. 剛剛加入了您的網誌到「我的網誌清單」
    來互相添加連結吧~ ^^

    回覆刪除
    回覆
    1. 連了。
      師兄個網好有趣呢。真估唔到信用咭同支付平台可以玩到咁出神入化呢。

      刪除
  10. 三人行兄,好地地星期五出篇肺腑之文,叫淡友情何以堪,仲點Happy Friday ah...誠以各位ching所言,要明一早就明,唔明講咁多次都口臭。曾經有能力買但唔買,到今時今日仲安慰自己樓市唔合理所以唔入市的人,不是終於受教訓,而係已經受咗好多次教訓(而不自知)!

    小弟讀過少少歷史,以前的皇帝、貴族、地主、工業革命後的資本家、近年的官商腦細們,無一不叫大家要努力工作,付出就會有回報!主流思想咁教育我地,偏鋒卻告訴我任你年薪百萬,面對洪水根本九牛一毛!

    繼續努力工作啦,如果唔係冇工作就冇寄託,咪只懂周圍宣揚自己以前啲威水史囉!

    回覆刪除
    回覆
    1. R兄,其實你比小弟年輕,但更早摸到財富遊戲的線頭。水平也肯定高於小弟。

      如果不是201x結婚,小弟有可能仍是淡友。至於及後的瘋狂趕車,小弟必須承認有很大的幸運成份,要小弟再做一次也未必敢這樣做。

      本文其實是在駁斥傳媒有意無意的誤導,而事實小弟也是一直身中傳媒毒,直到在非常後期才覺誤。家父其實在200x年,前已跟小弟說過孫九招出台後,樓市無乜可能再跌。當然老豆講的,做仔的絕對係聽唔入耳。而海嘯後,小弟的mentor也語重心長的給我說過(大意是):「海嘯給年輕人帶來以較平價格買資產的機會。」小弟也有朋友在5%首期能上車的年代上了車,在小弟覺悟前已換了三次樓,住了大單位。

      一個人能堅持每月“一省吾身”,已不是平凡人。每日三省吾身的,恐怕絕對是當代聖人。正常人是固執自負,只聽自己喜歡聽的話。小弟絕對是正常人,也是受盡教訓才轉軚的。

      如果有人有幸睇到這個留言,而仍又未找到財富遊戲的線頭,請思考一下這個留言。這個留言恐怕比敝文水蛇春的論述更貼地。轉變不是叫你買樓,而是儲財商,儲知識,儲視角,再去嘗試摸出財富遊戲的線頭在那裡。樓絕對不是唯一出路,敝博鄰居有債,有REIT,有收息股能找到出路的,但乜都唔做,抱現金,或搵咁多駛咁多,條路絕對不易行下去。

      在市場面前,小弟絕對謙卑。

      刪除
    2. 唉,再做一次,小子起碼有兩間漿胡山莊放係度「空置」。
      槓桿,不能太多,亦不能太少!
      我出去反省下自己先。

      刪除
    3. 又被快兄靚抽,似乎小弟要潛行修佛去了。
      以快兄財力,用鯰SIR條公式都應該唔止差兩間漿糊山莊呀嘛。何妨用佢條式,不如用金管局條式。金管局比得你借,銀行又借得到,應該安全到陳總都話Like。。。

      刪除
    4. 用佢條公式? 2.59?
      定係槓爆直債收19幾厘?

      三人行高人出山, 做咩又番去修佛?
      我出番去做野先
      工資奴一名

      刪除
    5. 水平是高是低、時間孰早孰晚,於我乃浮雲矣。面對汪洋大海,當你擁有更多,就更覺自己的渺小。

      芸芸眾生慘被資產利刃一分為二,向市場投誠,是應該,也是被迫。

      因為無得揀,所以有得揀,太玄了。

      刪除
    6. 快兄,高人出山? 小弟似乎又獻醜了。
      不過,小弟夢遊亂噏完,都係時候做野了...

      刪除
    7. R兄玄成咁,明顯已得道了...
      //因為無得揀,所以有得揀
      --> 因為四大央行太變態了,焗住向市場投誠,持有,並不斷增持優質資產好了...

      刪除
  11. 哈哈,在下不過小二一名,去左沖茶自嘆而已,不知不覺間各位已討論得好熱烈,今次睇怕有土地問題,沙發太遠,沙地太滿,在下乍見龍尾排到去公海,所以都係慢慢行好了。
    另外多謝三兄將公仔條腸畫埋出黎,不過呢,好多人還是會裝睡的。

    回覆刪除
    回覆
    1. 艾力兄,終於等到師兄出場了。
      小弟查實真心係寫傳媒誤導的。不過似乎大家唔係咁諗。
      最緊要老婆大人都話敝文寫得好。這已完全滿足了敝博成立目的,呵呵!

      刪除
  12. 從傳媒既行業生態就已經知道佢地寫既野冇咩參考價值,
    間間公司出手咁低只係不停磨蝕心志,三餐不繼不能溫飽又如何建立積極人生觀呢
    人生如何,寫出來的也差不多,最後咪剩下一些為左搵錢放棄理想既從業員囉。

    回覆刪除
    回覆
    1. 唉。。。在香港,從事冇乜“錢”途的行業,真係需要理想同強大的念力支持。叫我每日嘔幾千字出來,敝博都肯定全部變哂罐頭文。

      刪除

悶文觀止

井底嘩 (七):零息負息無限QE就在眼前 / 我們只是代人付鈔的水魚! (筆者推介)

這篇文章旨在回應懶師姐在其主場召喚筆者,要求確認環球資產價格暴漲的原因是QE。由於這個學術問題,並非一兩句就能解答,筆者在本博另文回覆。 很多人以為 QE 是環球資產價格暴漲的根本原因。這個推演表面上是正確,因為資產價格只是貨幣現象。 貨幣濫發,必然會導致以貨幣計價 ...